مش هتحتار في إختيار هدية تاني

محمود تعب فى التدوير على هدية مناسبة لخطيبته مكانش حابب الموضوع يطلع بشكل مبتذل ،بيدور بس على حاجة يقدر ييعبر بيها عن حبه ليها بالشكل الكافى ، خصوصاً انهم بيحاولوا توفير الفلوس بقدر الامكان عشان يقدروا على مصاريف الزواج فا بيحاول يختار هدية مش غالية.

سارة وأخواتها بيحاولوا يجيبوا هدية لمامتهم عشان عيد ميلادها, كل واحد فيهم عنده افكار مختلفة عن الهدية و كل واحد فيهم معاه مبلغ مختلف ،بيحاولوا يجيبوا هدية تساعد مامتهم اكتر وتبسطها وعارفين انها هتبقى غالية وده مش هيبقى سهل عليهم لأن مثلاً اختهم الكبيرة  لسه ربنا رازقها بطفل والموضوع مهم جداً ليهم ومينفعش يتجنبوا حد فيهم .

موضوع الهدية دايماً بيبان حاجة سهلة و بسيطة إللى ممكن اى حد يعمله ،آه اى حد ممكن يعملها بالطريقة الغلط بس الطريقة الصح دايما بتكون صعبة ، فيه شوية عوامل نفسية بتاثر على الموضوع, إنك بتحاول توصل لهدية مثالية إللى تعبر لشخص ما إنك مهتم بيه ،خلال الموضوع هنعرض بعض الجوانب النفسية ونساعدك ازاى تختار هدية مناسبة للشخص المناسب.

 أنا مش بقرأ الافكار:

أنت مش بتدخل جوا دماغ حد ولا بتعرف هو بيشوف الحاجة ازاى ، أنا عارف أنك بتتمنى أحياناً إنك تقرأ الافكار عشان تعرف هما عاوزين ايه بالظبط ، و مش معنى انك شخص اجتماعى وبتنسجم بسرعة إنك هتعرف تقرأ أفكار الناس اللى بتحبهم وتعرف ممكن تجيبلهم إيه .

 المفاجاة حلوة مفيش كلام:

أهم عنصر فى الهدية هو المفاجاة وانها تبقى حاجة غير متوقعة بس ده لازم برضوا يكون فى وقت مناسب وبيئة مناسبة فالمفاجاة حلو مفيش كلام بس مش عشان تفاجئ الشخص تختار وقت غلط .

 الهدية المناسبة فى الوقت المناسب:

فكرة الهدية مناسبة ولا لأ ده صداع كبير خلينا نساعدك فيه بشوية حاجات :

–    سن الشخص اللى هقدمله الهدية اكيد بيفرق المرحلة العمرية والاحتياجات بتاعة كل سن

–    ولد ولا بنت ده هيوفر عليك كتير

–    علاقتك بيه ايه ، اكيد لو صديقك غير لو زميل/ة عمل غير لو حد من قريبك وهل الهدية هتتعارض مع حالتة الاجتماعية ولا لأ.

–    نوع المناسبة اللى هتهدى فيها الهدية (عيد ميلاد- جواز- خطوبة – عيد حب – مناسبة عامة )

 الهدية المؤقتة:

حاول تبعد عن الهدايا المؤقتة او الى بتستعمل بشكل بسيط جداً او الحاجات العامة،زى انك تجيب كيكة عيد الميلاد مثلاً ،حاول تكون هديتك فيه خصوصية وانك تتاكد ان الشخص اللى هيستعملها هيستعملها بأستمرار.

و دلوقتي هنشوف معاكم إقتراحات للهدايا 😉

أولاً: لو هدية لراجل:

أول حاجتين هنحتاج نفكر فيهم :

1.  طبيعة شخصيته.
2. طبيعة الشغل أو طريقة حياته.

 

يعني مثلاً لو شخص رومانسي و بيحب الذكريات :

• ألبوم صور هيكون إختيار ممتاز.
• ساعة يد عليها صورتكم في الخلفية.
• برواز كبير فيه صورتكم مع بعض.
• تيشيرت مثلاً مكتوب أو مرسوم عليه ذكري بينكم.

إذا كان شخص عملي هيفرح بالحاجات إللي هيستخدمها في حياته اليومية و هتفرق معاه:

• ساعة شيك.
• محفظة حلوة.
• حاجة للعربية زي سبحة كريستال مثلاً أو لتزيين العربية من جوة.
• مج عليه كلمة تحفزه علي الشغل.

لو إتكلمنا علي طبيعة الشغل أو الحياة :

• الشغل الفورمال Formal مش بيرحم !  بدلة أو قميص شيك أو كرافتة.
• لو بيقابل ناس كتير في شغله هيحتاج يهتم بمظهره و طبعاً لازم نساعده عشان يهتم بمظهره 😀

و غير الشغل !

• البلاي ستاشن طبعاً ميختلفش عليه إثنين 😉
• سي دي بلاي ستاشن ممكن يعمله فرح 😀
• محبي الرياضة بقي هيفرحوا بأي هدوم ليها علاقة بالرياضة أو أدوات رياضية يستخدمها في البيت.

 

و لو هدية لبنت:

في حاجات كده بيحبها %90 من البنات و هنقسم الموضوع بشكل مختلف يناسبهم.

1. ميك أب ….. ميك أب….  ميك أب !  ( روج جديد , آي شادو, علبة كاملة مثلاً لو الميزانية تسمح)
2.  تيشيرت شكله حلو و لو حاجة ليكم أنتم الأثنين هتكون حلوة.
3.  برفان حلو
4.  لو رومانسية بقي دبدوب
5.  ممكن بوكس فيه شوكلاتة
6.  في بنات لو جيبتلها بوكيه ورد هتفضل طايرة من الفرح شهر !
7. ممكن لو مخطوبين و فرحكم قرب تجيبلها هدية أي حاجة ليها علاقة بالديكور تعجبها و تحتفظوا بيها بعد كده في شقتكم.
8. تقدر تعملها فوتو سيشن (Photo Session) مفاجأة ! و هبقي هدية عمرها ما هتنساها!
9. لو دلوعة بقي ممكن تحجزلها باكدج في بيوتي سنتر 😉
10. مراتك بقي شاطرة في شغل البيت إشتري جهاز كهربي في البيت يساعدها و يقلل مجهودها زي مايكرويف أو مكنسة بالكهرباء.
11. بتحب المطبخ  لو حاجة من أدوات المطبخ إللي بتسهل تقطيع الخضار مثلاً …. صدقني هتحبك 😀
12.  بتحب تعمل حلويات في البيت و تتفنن فيها يبقي تجيبلها الأدوات المستخدمة في التزيين.
13. ممكن تجيبلها هدية بسيطة دهب أو فضة كذكري تفضل لابساها علي طول.
14. تقدر تدلع مراتك بحجز يومين في فندق.
15. عربية و متزينة بالورد مع خروجة حلوة 😉

أهم حاجة لما تشتري لحد هدية تحسسه أنها حاجة مميزة ليه هو بس و إنك بتهديه بيها عشان هو محتاجها أو نفسه فيها عشان كده بيسموه “فن أختيار الهدايا” !

و من أحلي الحاجات لما تشتري هدية لحد قريب منك و وجوده يفرق معاك و الوقت نفسه إللي بتقضيه في شراء الهدية بيكون وقت لذيذ و مش بيتنسي.

لو عندكم أفكار هدايا حلوة شاركوها معانا أو ممكن تشاركونا بالهدايا إللي جاتلكم قبل كده و كانت عجباكم 🙂