شهر العسل بكام ؟ و لازم يكون معانا مبلغ كبير عشان نغيير جو ؟

في نوعين من العرسان قبل فرحهم، نوع غالباً بيكون قدامهم قائمة طويلة عريضة بحاجات يشتروها وطلبات للبيت وتجهيزات للفرح، ولما بيجي وقت التفكير في شهر العسل بيكون خلاص معظم الفلوس اللي معاهم خلصت، ونوع أصلاً بيحبوا التوفير والإقتصاد في كل تجهيزات الجواز من أول طلبات البيت والأجهزة لغاية الفرح و القاعة والفستان.

ومن هنا بتبدأ رحلة البحث عن مكان مش غالي لقضاء شهر العسل أو في أقوال أخري الـhoney moon

السؤال اللي بعد كده الفلوس اللي معانا تكفي نسافر ونعمل شهر عسل ؟

والإجابة، أيوه هتكفي، وده لأن في أماكن كتير جوه مصر مناسبة جداً جداً لوقت محتاج خصوصية ورومانسية زي شهر العسل وكمان تكلفة السفر والإقامة مش مكلفة أبداً.

دهب

دهب في سيناء من أقل الأماكن اللي ممكن تروحوها في شهر العسل في التكلفة، أولاً الموصلات ليها أسعارها معقولة جداُ وفي هناك فنادق كتير نضيفة جداً والخدمة فيها ممتازة

في دهب في أنشطة كتير ممكن أي عروسين في شهر العسل يعملوها؛ مثلاً الاستمتاع بجمال مياه البحر بشكل مختلف عن أي شاطئ تاني من شواطئ البحر الأحمر، الاستمتاع بالجو الهادئ هناك،أوطلعة سفارى في صحراء سيناء العظيمة.

ده غير الأنشطة المائية زي الغطس والسنوركلينج، وممكن تطلعوا سهرة بدوية في جبل من أشهر جبال دهب جبل الطويلات.

شرم الشيخ والغردقة

شرم الشيخ والغردقة من الأماكن السياحية الترفيهية المعتادة جداً في مصر والأنشطة اللي ممكن تتعمل فيها كتيرة ومتنوعة، ما بين استجمام واسترخاء وما بين الأنشطة المائية والمغامرات المختلفة ، ولو بتحب السهر والخروجات بليل هتلاقي أماكن كتير مناسبة للسهر هناك موجودة في سوهو سكويرو خليخ نعمة في شرم الشيخ أو الممشي السياحي في الغردقة.

الميزة الموجودة في شرم الشيخ والغردقة إنك زي ما هتلاقي فيها فنادق غالية جداً هتلاقي برضة فنادق بأسعار مناسبة جداً جداً والخدمة قيهم حلوة أوي.

مرسي علم وسهل حشيش

مرسي علم وسهل حشيش بقوا من الوجهات المشهورة لقضاء شهر العسل في مصر وده لأنهم زي شرم الشيخ والغردقة من ناحية البحر والأنشطة البحرية ومغامرات السفاري والصحرا والتكلفة المعقولة بس كمان بيتميزوا بالهدوء وإنهم غالباً مش زحمة.

الفيوم

أما بقي لو عايزين مكان مختلف بجو مختلف تقضوا فيه شهر العسل ومن غير ما تضطروا تدفعوا ثروة، فعندك الفيوم، الفيوم يعني الاستمتاع بالجو في وادي الريان و وادي الحيتان والشلالات والطبيعة والصحراء الساحرة.

سيوة

سيوة واحة ناس كتير بتعتبرها جزء من الجنة لأنها مليانه ينابيع معدنية وبحيرات مالحة وأشجار زيتون ونخل.

في سيوة ممكن تروحوا تستمتعوا بجمال الطبيعة في جزيرة طغاغين أوبحيرة الملح وممكن تعملوا سفاري وسط الصحرا بعربيات 4*4 أو تحضروا سهرة بدوية وتجربوا الأكل البدوي والشاي البدوي.

وكنوع من أنواع الخروج بره المعتاد في أنشطة شهر العسل ممكن تعملوا جولة ثقافية في “شالي”،المدينة الرئيسية في الواحة وتتفرجوا علي أطلال “قصرشالي” وقلعة شالي.

كل دي حاحات مختلفة وهتخليكم تعملوا شهر عسل لطيف بتكلفة لطيفة

الأقصر وأسوان والنوبة

الأقصر وأسوان والنوبة من اشهر وأجمل المشاتي في مصر يعني لو فرحكوا هيكون في الشتاء فاحنا بنرشحلكم الأقصر وأسوان والنوبة أو واحده منهم بتكلفة مناسبة جداً، علشان تقضوا شهر العسل علي ضفاف النيل، وتتفرجوا علي المعابد والمتاحف والمناطق الأثرية المختلفة.

وتركبوا مركب في النيل، وتروحوا جزيرة الموز في الأقصر أو جزيرة النباتات في أسوان وتزوروا البيوت النوبية الجملية وتشوفوا أهلها الطيبين.